Mass Arjdal idl agh s « Ifugga n tujjutin »
Mass Arjdal idl agh s
« Ifugga n tujjutin »
Tawckint tamaynut n tmdyazin
Yura -t: M.Oussous
Amdyaz d unfran mass Mohamed Arjdal, lli d yad issufghn gh usggwas n
2009 arra ns amzwaru n tmdyazt s uzwl n “aylal n iman”, yurri d dagh s usays n
usufgh n idlisn, lligh d iDi tawckint ns tis snat da mi isti s uzwl tikklt ad
ism n “ifugga n tujjutin”.
“ifugga n tujjutin”
iga tadla mZZiyn n 19 n tmdyazt, ittyaran s uskkil n tfinagh d uskkil alatin,
gis 52 n tasna, iggr nn gisnt umdyaz I mnnawt tghwmrin n wawal d isawl f
imukrisn n imazighn d tffugna, isawl f tdrfit d iskraf, isawl f watig n tgwmat
d warraw d twargiwin iskarn tiglgaD I wul ns amdyaz, tazwart n warra-ad tskr tt
massa Aziza Nafia, tiwi d gis, tini:
«Tikklt izwarn issufgh d
« aylal n iman », ifsi yas iskraf, irZm as iZiTi n ul ns, yajj t ad
yayl s ifrawn n taDfiwin d iskkiln, aylal ann ar fllagh izuzzur imuzzar n
tguriwin, infs fllagh timqqa n tmdyazin, ghilad hati iga d akkw « ifugga n
tujjutin », ad agh dlnt s iklan nnsnt, sslsnt agh akrkD n ijddign nnsnt.
M. Arjdal iga zg yat tufrint n middn lli yusin azaZu n
tirra, ar ittaws s aynna mi yufa, ar ittara i imZyann, yara i wid mqqurnin,
yara f willi ttaranin, tugt n aylli d ittffghn s tmazight ar bdda ittizwur mass
arjdal is fllas yura, s ul iZiln d iman izdign iran afulki i kuyan, mayann af nn
nttafa timdyazin ns ifssusn zDaynt s watign n tgwmat d tddukkla d tzdgi d tayri
n wakal d tmazirt d ufgan d tidt, tiwlafin ns ar d ssant gh ifrdisn n tudrt d
igran d tummndiwin n kuyass lli yagh issutln, ur mmukrsnt ur fsint, ur bahra
nit fawnt macc ur qqnnt ula llasnt, mayann af ittyafa ad tnt ghrn wid mZZiynin
ula wid imqqurn, kuyan rad nn gisnt yaf aylli isiggil, tagharast lli s ttyarn
iDrisn tga anawn, aggwatn lli s kturn ula nttni ar d ssan gh ku umnidn d isuyas
n tudrt …».
Ayyuz i mass Arjdal f tuggas ns,
ad issugt rbbi anaw ns ad tfrujju tskla ngh d tussna ngh!
ha yat tmdyazt gh twckint ns iskr tt ad tg tarragt I inkraf n tmazight:
Tiwargiwin
Imik n twargiwin
gh usga ann n tflwin
Qnnin rglnin
gh Darat n tghdwin n uzzal
Agh nn annigh ankruf
ur issin iD ula azal
ula assaghn n ussan
ur at ssiwidn iskraf
ula kSuDn tillas
rZmn i uswingm
iffayr yayl s ignna
ig tiwargiwin
ssudanin imdla
tllmnin aDu
ar starant timizar
zDint izTwan
s iznZarn n tafukt
gnunt sisn i3bann
magh tettl tlelli
skrnt gh uznZar isni
sslsin tt i yixf n unkruf
gin tt d umghar n tdrfit
ar ggarnt amud n ufra
bDunt ijddign n unaruz
bDunt tawckinin n tlelli
tilelli tilelli
tilelli i inkraf.