AYAD ALAHYAN isslkm tamdyazt i” Wis sa ignwan”
AYAD ALAHYAN isslkm tamdyazt i”
Wis sa ignwan”
Iffgh d ussan ad gguranin warra amzwaru n mass
AYAD ALAHYAN mi isti s ism: wis sa ignwan. Arra ad iga tawckint n tmdyazin imZZiyn ifssusn I tghri.
tZli tmdyazt n mass AYAD ALAHYAN s kkuZt
tghawsiwin:
1- tutlayt ns ifssusn, d
tguriwin lli d ittagwm gh isaffn n tudrt n kuyass lli nmyar, ar ilmma rZZmnt
tiggura nnsnt I usakwz n walli yaqqran bla kra n tmmara.
2- Tagharst ns lli s
isnay iwlafn n tmdyazin, issimim tnt i imghri, ismun gisnt gr iwaliwn iwngimn d
wid isawaln f tghawsiwin n tilawt islay ufus.
3- Tamawayt n tmdyazin ns
lli iSka s yan udm sis Izlin, ar t inn icckcum I usrir n tinayt mqqar t inn
bahra ur issaggug f taysi d tmyurt.
4- Amnru amzwaru d
umggaru lli f tsutul tmdyazt n AYAD ALAHYAN, ad t igan d twtmt lli d ittaggwan
gh izlan ns s mnnaw udmawn, tls mnnawt tmitar d tfras. Azwl lli isti i twckint
ar agh yad issurriy s umiy n hmmu unamir d tayri ns i tanirt mklli nit immal
waddal n warra.
Yiwi d mass Oussous f twckint ad
yini: “mass 3yyad isti abrid ns gh tmdyazt, ar agh iskar tayyughin n tayri gh tmdwin
n tasa, irZ itabutn, ikks i tgurrma n wawal addal, iml agh udm lli gis nenttl,
walli ira kuyan gh trgwsa n iD, ar as ittrwal gh tifawt uzal !
timdyazin n mass oyyad gant taghrrabut lli agh ittasin gh ill n twargiwin
tirumansiyin, zmzrnt agh f uluss d waDDangiwn n taDfi d tSDfi n iZula, wid
irddln adrar, rZn aghulid n isyafatn !
timdyazin ns gant inrfl igwmmrn tiguriwin n ku ass s usnSi n usmmaqql d
tukDt n umTTay immimn, ar agh iskar gh wawal lli nmyar taslit, issngf tt i
tayri, iskr agh gh tiZZa n tudrt ifalan n idd mas ngnnu tiswin ircan ur immDin
tayri d tiZilt !”.
tawckint n mass alhyan gis 16 n tmdyazt
ittyaran s uskkil alatin d win tfinagh ifsrn gh 60 n tasna, tffgh d gh ugadir s
twisi n tmsmunt n iZuran n Bellfa3.
Mass alhyan
iga aslmad n tutlayt tafransist, ighra gh lmastr izwarn n tmazight, art t
ittawi gh ufran d tskla d tussnils, iskr mnnawt tzrawin gh isuyas ad yaws gh
mnnaw inmuqqar n tzelgha n imaratn “Tirra”.
Ig usktur n
udlis ad mkad:
wis sa ignwan
mrad is
ini iyi
tafdayddut
ajj iyi ad am inigh
ajda3 izug
manza km inn
nkkin d kmmin
ini tgit
gh tghazut n wul nnm
mmutgh ad zuggh f ukrum nnm
zrigh nn gigm
wakwak
righ ad am skrgh
is d is ur tssnt
is d ur ta jju
stigh awn tamdyazt ad ilan
s ism “ini iyi” zgh tawckint ad iZiln afad ad tmDim taZilt n tguri d
isyafatn dar amara ngh mass Ayad Alhyan:
ini iyi
ini iyi
is d is iyi d
iqqan
ad nn mDlgh
timktit nnm
gh iglagaln n
tillas?
ini iyi
is d is iyi d
iqqan
ad sfrurigh
tawlaft nnm
tg ighd, yawi
tt waDu
ar ignwan n
urwass?
ini iyi
is d ad ghmugh
tasa
s tguDiwin ar
kigh ar tsirksis
tssmghi gh
wul tifrZiZin?
ini iyi
is d kmmin
tqqurt
aylligh tsghrt
ilaln
tssnghdt ighulidn
lligh ur trit ad iyi tllilt?