Tayri n tmagit: tullist n Lahcen Daoudi

issufgh d mass Lahcen Daoudi ittwayssann s tmdyazt gh tsgiwin n tfrawt d tahala arra nns izwarn gh ullis, ig as s ism "tayri n tmagit".

tullist ad iZiln gh uzTTa nns ula tutlayt nns, tettyara s uskkil alatin gh 28 n tasna, tffgh d ddaw umalu n tmsmunt n anaruz gh tsga n tfrawt.

tawlaft n usatl n udlis ad ikla tt mass farid zalhoud amaklaw d umdyaz axatar n tfrawt, mklli as iskr tazwart lligh d yiwi awal ad:

"S tumrt, umZgh asayrur n udlis amzwaru n umara LAHCEN DAOUDI lli mi iga s uzwl « Tayri n tmagit » ; iga dari addur amqran ad kcmgh amaDal ns asugnan, gmigh tullist ns, skrgh as asghti d wallas. Tawwuri n tzwart tga tamasayt d yat tarmit iran anfrn n tguri d tannayt tadlsant idran igan tawrikt izmrn ad tssisfiw i imghran taghara n umara d usatal n tlalit n udlis.

Tugga f tiddukla tamghlult gh ubrid n tirra n taskla tamazight ad tga tmatart tamzwarut iZlin s tduli lli isti Mass LAHCEN DAOUDI i udlis ns amzwaru lligh as isslsa yat tflwit n tZuri inu lli issumn tayri n unaZur d tin umara i wakal d wawal d ufgan. Taghrma n takasa n Imazighn.

Ur gis asurdu, adlis ad amaynu lli igan yat tmzzuyt gh igr n tullist rad yaws gh usmil n taskla tamazight lli ikcmn igr n tirra nttat lli igan gh mad izrin asnay utlay iZlin s iwssarn n tuwja... Ghayad ann yukz umara n TAHALA lli ssngh s umdyaz lligh yusi aghanib s unzgum n yan wanaw asklan waynat d tmazzagt ns tamdyazt. Yurm gh udlis ad tullist fagh tamttawt fadd ad izmmim s tgharast igan tawrikt taghrma tasklant ad s tt issar d imghran.

Tuda d Iddr lli ganin inbdadn n iwdan imnzawiyn n udlis ad, ur gin imugaz; tazlgha lli gh ddrn tga tamazirt n Timmuzgha. Macc ghmk lli nssn f ungal d tullist d umiy d tanfust, ur ghid tlli tsddi nw akud d udghar; ikka fllasn waddad uklisn… Imghran n udlis ad rad nn afin mas illa yan unkaz n usmqD gh tgharast lli s ittara Mass LAHCEN; ankaz ad ur ufigh ad fllas skrgh kra n usghti; ujjigh as tidrfit ns… Nnigh nkkin tadra n unkaz ad tga tamagnut acku tuckad gh yan umaDal asugnan asnbaghur lli izdin d unsay utlay".

Comments

[Farid Zalhoud]

Azul

Issusm iyi bahra ad d ghid afgh anghmis ad adlsan iZlin s udlis amzwaru n mass lahcen daoudi.Ar snimmirgh ulma i3zzan Aziza.Ar ssirimgh ad ibiks umdyaz ngh ad d iDi kra n tadla n tmdyazin gh mann ur yaggugn.

Tanmmirt

farid mohamed zalhoud