Nssn sul mad ssntln itran s ils n Fatima Moutaoukil

Tagziwin n itran” tawckint tamaynut n tmdyazt

  Arwass i iswingimn i ttinin : tamghart twayskar slid i tgmmi!

  TaDuri i wawal i ttinin tawtmt ur tZDar i usnflul! Ukuf i iZuRan n tkrkas izdin tamghart d isnwi d warraw!

 Asa n ismDal i wanaw ann n isasan ikrfn anlli i kra n middn!

had ultmatngh Fatima Moutaoukil ittwayssann s Tanirt gr tiyyaD tfka tugga f ma mi tZDar tawtmt Tamazight gh usays n usnflul d ubaraz n iswingimn d igr n tirra, ha tt id tusi d acnyal ns n tmdyazt mqqurn, tffgh d s usrir, ar tsillif s izlan ns immimn lli tsmun g warra ns amzwaru, tssfagh t id s uzwl n “tagziwin n itran”.

 Tawckint n “tagziwin n itran” lli d tssufgh massa Fatima, tga yan ugadir yattuyn ixatrn gh ibrgmmi n tskla ngh, acku tamdyazt ngh Fatima tga zg wanaw n imsnfluln issnn ad ttllmn ifalan n wawal ar zTTan idd n tguriwin ad gin tigDifin n izlan yaDfutn izggrn iZuran, ar d nn utn s iZuran gh wasa n iman, smdudin agwns n tiswin.

 Tagharast n tirra n massa Fatima tga tamaynut tatrart, tswa d gh tussna n umaDal d tskla n tutlayin yaDn slawan akkw tafransist acku tddr nn gh fransa, ur tbbi d iZuran n tussna ns, tsti ad tara arra ns izwarn s ils n tmagit ns tinttit, tfk s mk ann timitar n ma mi tzDar tmazight ad tini n iswingimn idran, d mani tlkm tawtmt gh taghult n usnflul.

Tamdyazt n massa Fatima ar k inn tlddi s tamimt n tguriwin, s tgharast ns ur nmyar gh uzTTa n iwlafn, s isyafatn ns lli dis nttidir s izlan ns.

 Adlis ad iga wis kkuZ gh usays n tmdyazt gh tsga n sus DaRat n “iludi” d “aZawan uRmmaD” d “tamda n izgh lli d akkw ffaghnin tagara ad, tsmunt gh 60 n tasna, s yan waddal iZiln ibrbcn s itran ismrghan mklli nit smrghant titratin n tmdyazin gh ugwns n wawlk n warra ns, timdyazin ad igan simrawt d smmust (25) gh uTTun nnsnt tga yasnt s ismawn:

Tarragt n twurga

Aghiluf n udrar

Aqqayn n izuZuDn

Man tudrt ?

Ifil

Atrs nusi t

Aggu d trufin ns

Tisit n iDgam

Kmmin yusin amaDal

Iskwla n tguriwin

Tamazirt inu

Amarg

AgwmmaD ann yaDn

Izlallayn n usurf

Izlan n unZar

Talatin

Ass ann

Affa n usaggwm

Nkkin d tiggas inu

Aswingm anabay

Gr iyi dik

Inghlan

 InsifaDn

Tudrt inu…tinm

 Isttighn

 

Yiwi d fllas mass M.Oussous gh tzwart lli yas iga: “FatimaTamdyazt n tga ilmma tisit n ul ns, tg agrD n tawtmt, tg tugga f waTTan n uzwag.

 Tga tisit n tasa ns acku nzDar akkw ad nn ngwmi imghan d tuga d isnnann n iman ns zg tsatmt n izlan ns: armmaD ns, inzgumn ns, icrrign ns, inuraz ns, ingaZn ns, ijiwjiwn ns ilsan addal yaDfutn idran immukrsn!

 Tga agrD n tawtmt acku tamdyazt ns tusi taghlaghalt n twargiwin n tawtmt tamazight, tarfufnt ns, amarg ns i tlelli d tdrfit d trZi n iskraf lli mi sul ttbndaqn imnayn n tgwccal n trrugza yuffn s waDu n ikrkas izrin irkukan, willi sul mi dln isasan n zik tawngimt ggammin ad frkn i tafukt n tghrma mani tlkm gh ughrab!

 Tga tugga f uzwag acku talalit n warra-ad iga nit talalit n tskla n ayt uzwag, willi istin nghd isti tn umuddu, zugn asin disn gh ulawn nnsn tussna nnsn d tayri n tmazirt nnsn d iZuran nnsn, willi d issmghin gh ils nnsn ijddign, ssgmun gis igwlifn mad tn issumumn gn tn d uslal n tirra nna rad yall atig, tg uddur i tussna nnsn, acku massa Fatima mqqar nn taggug f tmazirt s udghar, mqqar tt isghar uSmmiD n Bariz, ar trqqa s tguriwin n ils ns ilan aDu n uzuknni, taZ d bahra s ul ns lli ikkatn s udinan n tmagit ns, acku tizi lli tzug, trba dis akkw akal ns d tujjut ns, d tmqqa n unZar ns d ighwman n taylgi ns d umdlfaw ns d tsgni ibrbcn s itran gh tillas ns, itran lli s tzDar ad agh d tsslkm tabrat nnsn acku ar disn ttnyilkim s ul ns n umdyaz iZrran aylli ur iZrra kuyan!.”

  Afad ad tmDim tamimt n tguri dar ultma tngh taxatart Fatima Moutaoukil stigh awn tamdyazt ad ilan s ism “izlan n unZar” zgh udis n twckint ad ns tamaynut:

Izlan n unZar

kti d a yanZar

Izlan n tudrt

Ttirirt igh ar d teTTart

F igwzman n idrarn

Lli yagh d sul ighaman

Timqqit s tmqqit

As ar tslayt iskkiln

N twngimin

Iyi igudin f ul

Tsghust agwmmay

IZZln f ighd ikrmn

Inighi n yat twargit

IsfuruDn f tifrt

Timqqit s tmqqit

As swant tguriwin

taguDi n ifssi

Arant f udm nk

Aflujju n irafan

Timqqit s tmqqit

As ar nqqan

gh umaDal ad

Ulawn n imdyazn

Imurig n inirn

Gin tarula

Ng aggu

Aghanib

gh ufus n wiyyaD

Ssngfn tamdyazt

War taghwrit

I urtum n uhiyyaD…

tagziwin_n_itran