« Lalla tafukt » tawckint n tmdyazin n mass jadal
« Lalla tafukt » tawckint n tmdyazin n mass jadal
Issufgh d ussan ad mass Racid Jadal yat twckint n tmdyazin
ifulkin immimn mi iga s ism : «lalla tafukt », gis 52 n tasna, d 12 n
tmdyazt ittyaran s tfinagh d uskkil alatin s tgharast iswargan issaDfutn ul n
wanna tnt ighran, ismawn n tmdyazin ns gan mkad :
ASmmiD n wul
Lalla tafukt
Nkki d udrar
Ma fa za
Ul inu d winu
Rufigh ur ufigh
Lal n ughnbur
Ill igllin
Illis n mit
Tgrawl
TaZit
Annigh ayyur
Yucka d gh tzwart lli yas iskr mass M. Oussous mayad :
« Zgh zik ad
isnal masinissa udm ns i tafukt, ighr as mklli d iwin warratn n umzruy, middn
nttni ar as bdda ttrzafn uxsan n imZyann ssutrn as ad asn tfk win urgh, zg
akud ann ar tizi ad gh yura mass Jadal tawckint ns n tmdyazin, tga bdda tafukt
tamatart n tattuyt d tifawt d wuddur ixatrn d ufulki d tlelli, tga taghawsa lli
s nttwarga, niri tt akkw, ar nsiggil ad stt nlkm ad agh tsslf s iznZarn ns, ad
agh tssagh tiglgaD i wudmawn ngh, tafukt ilmma tga asagwl n isaggwmn ngh, ar
akkw sis nttagwl ixfawn nngh, macc zund nttat zund tidt ur ar nttizDir d gis
nrZm alln, acku aklulu ns ikka f iZri ngh!
Mayann
iga tafukt lli nsmuqqul gh ignna, tawjja n lgaz icttan ijddrn ixf ns, tafukt n
mass Jadal nttat tga illis n tmdyazt, ul n umdyaz agh d tlul, tga tislit n
umarg, tg taydrt n iman ns, tlsa d s itngh timlsa n tguriwin ittwargan
ittwagran s tgharast immimn, s tghlaghalt yaDfutn, ar nn kkatnt gh iZnin n
tasa, ar zggrnt ulawn zund usman !
Ur rad skarksgh igh nnigh is illa mass Jadal s wanaw ns gh tirra iZli sis fghnit, ur t irwas yan ur irwas yan gh tgharast lli s ittara d ustay n isqquln ns d iwlafn ns, iDrfan ns n izlan gan angi n taDfi, fssusn iZiyn, aywuln macc dran, izDar s tguriwin n ku ass ad nn yut afa n iswingimn mqqurnin, acku tussna ns idran gh tmazight d tfransist tfka yas ad yagwm gh ighbula n tussna tamaDlant, isu d gh una n ils ns amazigh d taysi lli d ikkusa gh mas, ifk agh s tmdyazin ad ns tugga n is tzDar tmazight ngh ad tini mad yattuyn bahra gh wawal ula atig ula ammak s tguriwin iddrn f ilsawn n middn, trgh sul tmZla nnsnt gh iman n kuyan gitngh ! »
Mass jadal iga aslmad n tfransist gh llisi, ig gh imzwura n lmastr n tmazight gh ugadir, tg tadla yad tamzwarut ns lli rad Dfrnt tiyyaD s tayri n umdyaz ad mqqurn.