Ugwzirn "tayib amgrud"

Ugwzirn "tayib amgrud"

issufgh d mass tayyib amgrud tawckint ns tis snat n tmdyazin ussan ad nit ig as s ism ugwzirn.

ugwzirn gh tmazight gan tn idgharn lli iffrghn anfn i uärf yughghdn igh ur issn walli ikkrzn ad yamç awllu ngh as iffrtl, isti umgrud taguri ad afad ad tg tamatart n tmukrisn d udmawn n tfrghi gh tudrt d talla n imazighn.

adlis ad iga wis sin n mass tayyib amgrud acku issufgh d yad gh 2008 tadla izwarn s ism n “agad n tidt”.

   izêli umgrud s tgharast ns gh tmdyazt acku anaw n imdyazn lli issnmn tiguriwin n tmazight isu-d g isaffn iqburn, macc yugga nn s wafatn n tirra titrarin, mayan af nn ttafa idêrisn ns utn s izûran nnsn gh tgharasin tiqqburin macc zdin d tinayt.

  ighi mass amgrud ad yara s kigan n tgharasin, ismun gr kigan n udmawn n tmdyazt gh tmazgha, yura gh wasif n sidi hmmu n sus ula win ccix mhnd umhnd n lqbayl, yura s tgharast n azayku mklli yura s tgharast tartar.

tazwart n udlis iskr tt mass akunad, yini gis: “ïïiyib Amgrud içli xf tugt n imdyazn yaän, acku ass lli d ilul yufa-d (rribab) d (luïar) yaf d amarg g tama n uhlallu (berceau) ns, tawja ns tga tin umarg, ilmma yufa-d avbalu, iddm nit ar issa s turawin, ur igi takunt (étrange) ad ittazzal umarg g tvssa ns mk lli ttazzaln idammn n tudrt g ul ns, ass lli issnta ar ittini amarg, inna-t s imassn ns, yini-t s insayn ns (traditions); mk lli s ar t-ttinin ëëways, s tvarast ns tamnsayt lli ibddn xf tlalayt, d iwlafn (images) inmyarn lli xf yad ftan ayt umarg aqbur.

  macc artum (destin) n umdyaz nv ur as isti ad ig ëëays, isti as kra lli nn yaggugn xf tçuri ad: isti as ur d vas ad ig aslmad, macc nnig mk ann ad ig yan g imvnasn n tmazivt.

  G jaj n umussu amaziv yugm dav umdyaz nv g yan uvbalu yaän: yat tussna ivban (idran) xf tutlayt tamazivt, d umzruy ns, d inmvurn ns d tkaylalin (ambitions) n tarwa ns d usmmaqql nnsn i imal n tmazivt d imazivn;

  Tussna ad tamaynut trks d tussna tamnsayt (traditionnelle), llig rksnt, mmkcmnt grasnt fkant yan wanaw idrus ad yili dar kra n umdyaz amaziv yaän lli ittuwssann ar ass ad.

ilmma g tadla n Uåzirn da nn ittafa imvri tifras n snat tussniwin ad:

- tamdyazt isdan f tlalayt (oralité) lli ittuwssann dar ayt umarg aqqbur,

- iwlafn imnsayn ifawn, ur svawsan g tmvrit d imvri ad ttëççan ixfawn nnsn afad ad tnt ëmsn (comprendre),

- inaw (discours) anmyar lli yusin tamussni (sagesse) idran, tg takasit (héritage) tamnsayt n umarg nv.

  macc dav iwlafn imaynutn, d tlalayt immëçan, inaw atrar anfrak lli d ipbbln i imukrisn n uzmz ad d tutlayt izdgn…. ».

adlis ad n mass amgrud gis 118 n tasna, ittyara uzgn ns s tlatinit d uzgn ns s tfinagh, gis 26 n tmdyazt immimn iktarn s inzgumn n imazight: akal ula afgan ula awal!