ixfawn d isasan n Mohamed Oussous
** ** ** *** *** ** ** **
ixfawn d isasan
ngh iswingimen ikkerfn ixf ;
arra amzwaru n tflsaft tamazight
s tmazight
** ** ** *** *** ** ** **
Adlis n ixfawn d isasan lli-d issufgh Mohamed Oussous iga yan warra isawaln f tmukrisin n tmagit d uswingm n ddin d taydyulujiyin illasn lli ikrfn anlli d twngimt n ufgan amazigh, ism ns iga snat tguriwin:
1-ixfawn: iguyya, macc ur-d iguyya iqqurn nv-d iqllaln, macc ira ad yini: tawngimt, anlli, imiss lli s iswingim ufgan.
2- isasan: mnnaw n isisi, igat uzttâ n tbghaynust, ira ad yini s tguri ad, iskraf lli ittassn aswingm n ufgan, kksn as ad iswingm s tgharast ifawn, skucmnt, ngh as ssfrghn aswingm d usmmaqql, zund aswingm ngh taydyulujit n “t3rabuslamt” lli nn ittqqnn afgan s tsrgwlt n ti3urrba.
arra ad tssfught id tmsmunt tamaynut, iga 104 n tudmt, ilin gis 36 n umagrad (articles) d yat tzwart lli as iskr usalmad Muhmmad Akunad, ig-t umara ns d trzzift I umazzal amazigh amqqran ali sidqi azayku, ittyara s tmazight n sus ifawn ighusn, lli-d ittasin tiguriwin zg ku tasga n tmizar n tmazgha. ar immal ma s tzdâr tmazight ad tasi aswingm aflsaf, tara f imukrisn n uswingm mknna gan, adlis ad ilmma iga yan wanaw n tirra urta jjin gis uran imazighn, acku tugt n aylli-d ittffaghn ar ghilad ur ar ittffagh asays n tskla, ur jjin kcmn imazighn igran yadên n tussna s wawal nnsn, mayann af iga udlis amzwaru gh wanaw ns, ar d issaggwa ma mi tzdâr tmazight gh ku asays gh isuyas n tussna d uswingm.
inna umara n udlis ad g uskcm ns:
“Arra yad ur igi amarg, ur igi taflsaft, ur igi tallasin d umiyn, ur ssngh nkki s ixf inu ma yga! Mac ssngh is gis kra n tmqqa n iswingimn, ad d ukan uffnt g ixf inu, ar ttaddumnt, ar asnt ssmdaygh timkilt n tirra, krfgh tnt mqqar ur nnigh ayamar i yskraf!
Iskkiln lli gis illan gan igdâd, rwln d zg ignna n ul inu, d unlli inu, gwmrgh tn, ggh tn g izîtî n tguriwin!
Righ gis ad ig uggar n tirra nna aqqrant walln ur smussnt anlli, acku arra nna tghrit ur ak d issuss kra n ikwdrâr d isasan n ixf nk, ur ak irwi tagharast lli s tsnit tazra n tudrt, ur ak izluzzi amk lli s tgwnit tighawsiwin gh iswingimn nk, han ur akw bahra yuf awal n iwssarn ddu ighrban s tissi n watay d waqqayn n trufin!”
ha yan umdya n imagradn n udlis ad:
Ixf n tawwukt d win ighirdem
Max ur ili ighirdem ixf?
Ar ittini yan umiy amazigh is d lligh ar yattû ugllid imqqurn ixfawn, iggwra nn ighirdm, ur iddi zikk ad d yawi ixf ns. g ubrid n twada ns, inmaggar tawwukt, inna yas: "is sul ghaman ixfawn?", trar as d: "yan ixf zund winu ad sul ighaman! " yadû d nit, ur sul idêfr agharas ad d yawi ixf ns, inna yas: "igh iyi d iqqan ixf igan zund winm, yuf war ixf!"; iqqim ilmma ighirdm d war ixf. Yan innan tawwukt, ar d iktti ixrtuffa d iqwirn d imrduln, ar as d ittikwcâd ixf ns tillas, ixf n tawwukt ilmma iga dari tamatart n uswingm illasn, aswingm ittawin s urwass!
Ini nit tamttant n uswingm, d ubukêd n tayttî d ukttur n malxf d unlli s gar iswingimn!
Igh d iqqan ad isti yan gr ad yili ixf n tawwukt (aswingm n tillas) d ad akw ur ili ixf, yuf ad ig war ixf!